Ամեն ինչ, ինչ պետք է իմանալ Տաթևացի տնտեսագիտական օլիմպիադայի մասին
- SED Team
- Jul 19
- 3 min read
Updated: Jul 21
Համառոտ
Տաթևացի տնտեսագիտական օլիմպիադան մրցույթ է ավագ դպրոցականների համար, որը հիմնադրվել է 2023 թվականին։ Մասնակցությունն անվճար է և բաց բոլոր դպրոցների համար։ Այն մաս է կազմում է Միջազգային տնտեսագիտական օլիմպիադային։ Օլիմպիադան բաղկացած է երեք փուլ՝ դպրոցական, հանրապետական և միջազգային։
2023 թվականից մեկնարկած Տաթևացի տնտեսագիտական օլիմպիադան (ՏՏՕ) մրցույթ է, որը ստեղծվել է՝ ոգեշնչելու ապագա տնտեսագետներին և ֆինանսական ոլորտի առաջնորդներին։ Տաթևացի տնտեսագիտական օլիմպիադան International Economics Olympiad-ի մաս է կազմում, որի նպատակն է՝ խթանել աշակերտներին ուսումնասիրել իրական աշխարհում առկա տնտեսական խնդիրները, զարգացնել վերլուծական կարողությունները և հասկանալ, թե ինչպես են տնտեսագիտական սկզբունքները կիրառվում դասարանից դուրս։
Եթե ցանկանում ես հասկանալ՝ ինչպես է աշխատում ֆինանսական աշխարհը, ՏՏՕ-ն հիանալի հնարավորություն է քեզ համար։ Այս մրցույթը ոչ միայն զարգացնում է մտածելու կարողությունը, այլ նաև օգնում է բացահայտել նոր հետաքրքրություններ և հնարավոր կարիերայի ուղիներ տնտեսագիտության ոլորտում։
Ի՞նչ է Տաթևացի տնտեսագիտական օլիմպիադան (ՏՏՕ)
ՏՏՕ-ն կրթական փորձառություն է, որը ոչ միայն տնտեսագիտության տեսությունը լավ սովորելու հնարավորություն է, այլ նաև սովորեցնում է մտածել տնտեսագետի պես՝ ստուգել ենթադրությունները, վերլուծել միտումները և առաջարկել գործնական լուծումներ իրական խնդիրների համար։
Մասնակիցները աշխատում են բարդ տնտեսական սցենարների վրա, մշակում ստեղծագործական լուծումներ և այդ կերպ զարգացնում քննադատական մտածողությունն ու արագ որոշումներ կայացնելու հմտությունները։
ՏՏՕ-ն միավորում է Հայաստանի ամենապայծառ աշակերտներին՝ ավելի քան հարյուր դպրոցներից, ընդգրկելով հազարավոր 10-12-րդ դասարանցիների և տալով նրանց հնարավորություն փայլելու միջազգային հարթակում։
ՏՏՕ-ին մասնակցելը ամբողջությամբ անվճար է։ Սա երաշխավորում է, որ տնտեսագիտական կրթությունը և հնարավորությունները լինեն հասանելի Հայաստանի բոլոր աշակերտների համար՝ անկախ իրենց բնակության վայրից կամ սոցիալական վիճակից։
ՏՏՕ-ի կառուցվածքը
Տաթևացի տնտեսագիտական օլիմպիադան (ՏՏՕ) բաղկացած է երեք փուլից։
1. Դպրոցական փուլ
Այս փուլը անցկացվում է առցանց ձևաչափով և հասանելի է Հայաստանի բոլոր 10-12-րդ դասարանցիների համար։ Այն ուղղված է հիմնական տնտեսագիտական հասկացությունների ստուգմանը։ Ֆորմատը մշակված է այնպես, որ յուրաքանչյուր աշակերտ, անկախ դպրոցի ռեսուրսներից կամ վայրից, հնարավորություն ունենա մասնակցելու և ցույց տալու իր գիտելիքները։
2. Հանրապետական փուլ
Դպրոցական փուլի լավագույն մասնակիցները հրավիրվում են Հանրապետական փուլ։ Այն անցկացվում է Երևանում և բաղկացած է թե՛ գրավոր, թե՛ բանավոր փուլերից։ Այս փուլում արդեն ստուգվում են խորացված տնտեսագիտական գիտելիքներն ու վերլուծական մտածողությունը։ Աշակերտները կարող են մասնակցել իրենց նախընտրած լեզվով՝ հայերենով կամ անգլերենով։
3. Միջազգային փուլ
Հանրապետական փուլի 5 լավագույն աշակերտները, ովքեր թե՛ թեստը, թե՛ բանավոր փուլը անցնում են անգլերենով, ներկայացնում են Հայաստանը Միջազգային տնտեսագիտական օլիմպիադայում, որը կազմակերպվում է EconomicsOlympiad.org-ի կողմից։ Այստեղ նրանք մրցում են ավելի քան 20 երկրների ազգային հաղթողների հետ՝ ցուցադրելով իրենց տնտեսական գիտելիքները համաշխարհային մակարդակում։
Ի՞նչ պետք է իմանան մասնակիցները՝ մասնակցելուց առաջ
ՏՏՕ-ն նպատակ ունի բարձրացնել տնտեսագիտական և ֆինանսական գրագիտությունը ողջ Հայաստանում։ Միջազգային փուլին հասնելու համար անհրաժեշտ է պատրաստվել և լավ տիրապետել հիմնական հասկացություններին։
Միկրոտնտեսագիտության և մակրոտնտեսագիտության հիմնական սկզբունքները
Անձնական ֆինանսների կազմում և պլանավորում
Իրական տնտեսական իրադարձությունները և արդի խնդիրները (օրինակ՝ ինֆլյացիա, գործազրկություն և այլն)
Ուշադրություն․ ցանկացած աշակերտ իրավունք ունի մասնակցել ու հանձնել քննությունը, նույնիսկ եթե իր դպրոցում տնտեսագիտությունը որպես առանձին առարկա չի դասավանդվում։
«Տաթևացի տնտեսագիտական օլիմպիադայի հաջողությունը վկայում է մեր երիտասարդների գիտելիքի, ձգտման և ներուժի մասին։ Շնորհիվ մեր նվիրված գործընկերների աջակցության՝ մենք սկսել ենք մի կարևոր ճանապարհ՝ բացահայտելու ու զարգացնելու նոր սերնդի կարողությունները։ Բայց սա միայն սկիզբն է։ Այս արժեքավոր նախաձեռնությունը շարունակելու և ընդլայնելու համար մեզ անհրաժեշտ են նոր աջակիցներ։ Միայն համախմբված ջանքերով կարող ենք զորացնել մեր երիտասարդներին, որպեսզի նրանք դառնան մեր երկրի տնտեսական ապագայի առաջնորդները։ Եկեք կերտենք այդ ապագան՝ միասին»։
Դոկտոր Արամ Ղազարյան
Վարքագծային որոշումների կենտրոնի հիմնադիր և տնօրեն
Ինչու՞ մասնակցել Տաթևացի տնտեսագիտական օլիմպիադային
ՏՏՕ-ն պարզապես մրցույթ չէ։ Այն կրթական փորձառություն է, որը կարևորում է քննադատական մտածողությունը, ստեղծարարությունն ու գլոբալ տնտեսական խնդիրների խորքային ըմբռնումը։
Մասնակցելով՝ դու կկարողանաս․
Մնալ մոտիվացված՝ ձեռք բերելով գործնական գիտելիքներ տնտեսագիտության և ֆինանսների ոլորտում
Ցուցադրել գիտելիքները թե՛ հանրապետական, թե՛ միջազգային մակարդակներում
Զարգացնել կարևոր հմտություններ՝ հաղորդակցման և ռազմավարական մտածողության համար
Ընդլայնել ակադեմիական շրջանակը՝ կապ հաստատելով մենթորների, մասնագետների հետ և միանալ ՏՏՕ շրջանավարտների համայնքին
Տարբերակվել բուհերի դիմումների և ապագա կարիերայի հնարավորությունների ժամանակ՝ ստանալով հավաստագրեր, մրցանակներ, և հրավերներ այլ ակադեմիական միջոցառումներին մասնակցելու համար
Մասնակցությունը ՏՏՕ-ին նշանակում է համարձակ քայլ դեպի ապագա՝ լինելով այն երիտասարդ առաջնորդներից մեկը, ովքեր կձևավորեն Հայաստանի տնտեսական զարգացումը և դիրքը աշխարհում։
Ինչպես գրանցվել․ ՏՏՕ-ին դիմում են դպրոցները, ոչ թե աշակերտները
Տաթևացի տնտեսագիտական օլիմպիադային (ՏՏՕ) մասնակցելու համար հայտ ներկայացնում են դպրոցները, ոչ թե աշակերտները՝ անհատապես։
Գրանցվելուց հետո դպրոցը հնարավորություն է ստանում կազմակերպելու դպրոցական փուլը, որը անցկացվում է առցանց ձևաչափով՝ դպրոցի պատասխանատու ներկայացուցչի վերահսկողությամբ։ Դպրոցական փուլը իրականացվում է նախապես համաձայնեցված ժամանակացույցով՝ համագործակցությամբ մեր թիմի հետ։
Դպրոցում սովորող 10-12 դասարանների բոլոր աշակերտները կարող են մասնակցել օլիմպիադային՝ անկախ իրենց գնահատականներից կամ առարկայական առաջադիմությունից։
Այս մոդելը ապահովում է, որ մրցույթն անցնի կազմակերպված, հստակ և հասանելի լինի Հայաստանի բոլոր դպրոցների համար։
ՏՏՕ 2026-ի համար դպրոցների գրանցումը կմեկնարկի 2025 թվականի սեպտեմբերին։
Ամփոփում
ՏՏՕ-ն պարզապես ակադեմիական միջոցառում չէ։ Այն դուռ է բացում դեպի նոր բացահայտումներ, առաջնորդություն և միջազգային հնարավորություններ։ Եթե քեզ հետաքրքրում է տնտեսագիտությունը, ֆինանսները և իրական խնդիրների լուծումը, ապա ՏՏՕ-ն հիանալի հարթակ է աճելու և փայլելու համար։
ՏՏՕ-ն կարող է դառնալ քո կյանքի կարևոր մի մասը։ Հիմա ժամանակն է՝ ընդունել այս մարտահրավերը, ներդնել ժամանակ ու ջանք նախապատրաստման համար և անել համարձակ քայլ՝ դառնալու Հայաստանի ապագա տնտեսական առաջնորդներից մեկը։
Comments