Տաթևացի տնտեսագիտական օլիմպիադա 2026թ - Ինչպես գրանցվել Օլիմպիադային մասնակցելու համար

SED Team
Jan 15
3 min read

Համառոտ

Այս տարի Տաթևացի տնտեսագիտական օլիմպիադան կրկին միավորում է Հայաստանի դպրոցներին՝ խթանելու աշակերտների տնտեսական մտածողությունն ու վերլուծական հմտությունները։ Օլիմպիադային կարող են մասնակցել բոլոր դպրոցները, անկախ նրանից՝ ունեն տնտեսագիտության առարկա, թե ոչ։ Գրանցումը կատարվում է դպրոցի ներկայացուցիչի միջոցով, լրացնելով ձևանմուշը։

Դեպի Տաթևացի տնտեսագիտական օլիմպիադա 2026թ

Շատերը մտածում են, որ տնտեսագիտությունը միայն թվեր է ու հաշվարկներ։ Սակայն այն սովորեցնում է մտածել՝ ինչպես հասկանալ պատճառահետևանքային կապերը, ինչու են մարդիկ որոշումներ կայացնում այս կամ այն ձևով, և ինչպես կարելի է գտնել առավել արդյունավետ լուծումներ։

Հենց այս մտածողության զարգացնումն է թիրախավորում Տաթևացի տնտեսագիտական օլիմպիադան, որը նախատեսված է 10–12-րդ դասարանների աշակերտների համար և մաս է կազմում միջազգային տնտեսագիտական օլիմպիադային ավելի քան 30 երկրների մասնակցությամբ։

Ովքե՞ր կարող են մասնակցել

Օլիմպիադային կարող են մասնակցել բոլոր դպրոցները, նույնիսկ եթե դպրոցում տնտեսագիտությունը չի դասավանդվում որպես առանձին առարկա։ Հասարակագիտություն և մաթեմատիկա առարկաներից ստացած գիտելիքները բավարար կլինեն մասնակցության համար․ ամենակարևորը հետաքրքրությունն է և ցանկությունը՝ փորձելու ուժերը նոր ոլորտում։ Ավելին՝ յուրաքանչյուր 10-12 դասարանցի կարող է մասնակցել անկախ առաջադիմությունից։

Մի քանի փաստ օլիմպիադայի մասին

Տաթևացի տնտեսագիտական օլիմպիադան նախաձեռնություն է, որի նպատակն է խթանել տնտեսագիտական կրթությունը և ձևավորել աշակերտների մոտ կիրառական տնտեսական մտածողություն։
Յուրաքանչյուր դպրոցի մասնակցությունը ներառում է տարբեր 10-12 դասարանների բոլոր հետաքրքրված աշակերտներին․ որքան շատ է ներգրավվածությունը , այնքան ավելի նշանակալի է թե՛ դպրոցի ներդրումը, թե՛ աշակերտների փորձառությունը։
2025-ին Տաթևացի տնտեսագիտական օլիմպիադային մասնակցել են ավելի քան 100 դպրոց Հայաստանի տարբեր մարզերից։ Այս տարի օլիմպիադան կրկին բաց է բոլորի համար՝ բարձրացնելու տնտեսագիտության նկատմամբ հետաքրքրությունը։
Տաթևացի տնտեսագիտական օլիմպիադան անվճար է բոլոր աշակերտների և դպրոցների համար։

Ինչպե՞ս գրանցվել

Գրանցումը կատարվում է միայն դպրոցների կողմից, ոչ թե անհատ աշակերտների։ Գրանցվել կարող են բոլոր կրթական հաստատությունները, որոնք ունեն 10-12-րդ դասարաններ կամ այդ տարիքային խմբին համապատասխանող ուսանողներ։ Դպրոցի ներկայացուցիչը՝ ուսուցիչը լրացնում է ձևանմուշը դպրոցի անունից և գրանցում դպրոցը Տաթևացի տնտեսագիտական օլիմպիադային։

Գրանցման համար անցնել այս հղումով՝ https://forms.gle/44P5PNakqdGJ8TMm6

Օլիմպիադայի փուլերը

Դպրոցական փուլ (առցանց) - Կազմակերպվում է ձեր դպրոցում՝ ձեր ընտրած օրը սահմանված ժամանակահատվածում։ Թեստը հասանելի է հայերեն և անգլերեն տարբերակներով։
Հանրապետական փուլ - Լավագույն արդյունքներով աշակերտները անցնում են հանրապետական փուլ, յուրաքանչյուր դպրոցից ոչ ավել քան 5 աշակերտ։ Հանրապետական փուլը ներառում է գրավոր և բանավոր մասեր։ Փուլի ավարտին, անկախ մասնակցության լեզվի ընտրությունից, հաղթողներ են ճանաչվում 15 լավագույն աշակերտները, որոնք պարգևատրվում են պարգևատրման միջոցառման ընթացքում՝ մայիս ամսին։
Միջազգային փուլ - Լավագույն 5 մասնակիցները, ովքեր անցել են հանրապետական փուլը անգլերեն լեզվով ստանում են հնարավորություն մասնակցել միջազգային փուլին և ներկայացնել Հայաստանը Միջազգային տնտեսագիտական օլիմպիադայում։

Ինչու՞ մասնակցել

Տաթևացի տնտեսագիտական օլիմպիադան հնարավորություն է տալիս դպրոցներին ՝

Միանալու միջազգային կրթական նախաձեռնությանը,
Խթանելու ուսանողների հետաքրքրությունը տնտեսագիտության նկատմամբ,
Դառնալու Դեսպան դպրոց, բարձրացնելու դպրոցի հեղինակությունը և ընդլայնելու մասնագիտական կապերը։

Աշակերտների համար այն հնարավորություն է՝

Զարգացնել քննադատական ու վերլուծական մտածողությունը,
Ձեռք բերել փորձ հետագա ուսման և կարիերայի համար,
Հանդիպել համախոհների ու նոր ընկերների,
Ներկայացնել Հայաստանը միջազգային հարթակում։

Նախաձեռնություններ

«Ամենաակտիվ դպրոց» ծրագիր.

Յուրաքանչյուր մարզից կընտրվեն երեք ամենաակտիվ դպրոցները, որոնք կունենան աշակերտների մասնակցության ամենաբարձր ցուցանիշները։ Ընտրված դպրոցները կընդգրկվեն «Ամենաակտիվ դպրոց» անվանակարգում և կպարգևատրվեն՝ պարգևատրման միջոցառման ընթացքում՝ մայիս ամսին։ Այս անվանակարգում կընդգրկվեն միայն այն դպրոցները, որոնք կապահովեն առնվազն 40 աշակերտի մասնակցություն։

Դեսպան Դպրոցներ.

Շարունակվում է Դեսպան Դպրոց ծրագիրը։ Այն դպրոցները, որոնք կներկայացնեն առնվազն 50 աշակերտ և կխթանեն տնտեսագիտական կրթությունը իրենց դպրոցում և համայնքում, կստանան «Դեսպան Դպրոց» կոչումը՝ պատվոգրով, պարգևատրման միջոցառման ժամանակ։

Բոլոր դպրոցները կարող են դիմել այս ծրագրին միանալու համար մեր կայքում՝ https://www.sed.am/partnership

Միացե՛ք մեզ

Տաթևացի տնտեսագիտական օլիմպիադան հիանալի հնարավորություն է դպրոցների համար՝ ստեղծելու տնտեսական մտածողություն ունեցող սերունդ, միաժամանակ դառնալով կրթական նորարարության մաս։